A Escola Municipal de Música Magariños de Brión celebrará mañá venres 14 de xuño, ás 19:00 horas, o concerto de clausura do curso académico 2018/2019. Un acto que terá lugar no auditorio do centro social polivalente. A entrada é totalmente libre e de balde.
O evento comezará cunha actuación da Banda de Música Magariños, que interpretará tres pezas. Acto seguido terá lugar a entrega de diplomas ao alumnado da ESMU Magariños, que dará paso á actuación do conxunto coral da ESMU Magariños, que pechará o curso escolar 2018/2019.
Este concerto está organizado pola Escola Municipal de Música Magariños de Brión, coa colaboración do Concello de Brión, a Deputación da Coruña e a Consellería de Cultura, Educación e Ordenación Universitaria.
